Topaguneak BENITO ANSOLA BEKEN lehen edizioa aurkeztu du. Beka horien helburua euskal kultura zabaldu eta ikus-entzunezkoen ekoizle gazteei laguntza ematea da, eta Topaguneak berak sortu ditu, Lekeitioko Udala eta Euskal Zine eta Bideo Bileraren laguntzaz eta Eusko Jaurlaritzako Gazteria eta Gizarte Ekintzarako Zuzendaritza zein Bizkaiko Foru Aldundiko Gazteria Zuzendaritzaren babesaz.

Bekak sortzaile gazteei zuzenduta daude, eta euskarazko ikus-entzunezkoak sortzea lagundu nahi dute. Horretarako, 4.000 euroko bi beka emango dira gehienez, iraupen laburreko ikus-entzunezko lanak ekoizteko. Bekak jasotzeko, hautagaiek ikus-entzunezko lanaren proiektua aurkeztu beharko dute irailaren 27a baino lehen. Ondoren, epaimahai batek jasotako proposamenak aztertu eta bi onenak aukeratuko ditu beka emateko. Deialdiaren oinarri guztiak dokumentu honetan topa daitezke.

Lekeitioko Zine eta Bideo Bilera eta Benito Ansola

Bekadunak zeintzuk izan diren Lekeitioko Zine eta Bideo Bileran iragarriko da, azaroaren 27ko itxiera ekitaldian, eta orduan jasoko dute bekaren lehen erdia. Bigarren zatia, berriz, lana bukatutakoan emango zaie. Edonola ere, bekadunek 2011ko maiatzaren 27ra arteko epea dute lana bukatu eta entregatzeko. Haien zabalkundea errazteko, beka lortzen duten lanak Creative Commons Aitortu-Partekatu lizentziapean hedatuko dira.

Benito Ansola Lekeition jaio zen 1928ko abuztuaren 13an. Humanitateak, Filosofia eta Teologia ikasi zituen Bergaran eta Gasteizen, eta 1953an apaiz ordenatu zuten Bilbon. Lekeitioko parrokoa izan da 24 urtez, baina gainera, zinemazale amorratua izanik, euskal zinema bete-betean bultzatu du, eta zinegintza irakaslea izan da Markinako Lanbide Eskolan. Markinako zine-kluba eta Euskadiko beste zenbait herritakoak ere zuzendu ditu, eta 1978an, Euskal Zinema Bilera antolatzen hasi zen Lekeition, ikasle ohi batzuekin. Aurkezpenean esan duen moduan, 'ohore handia' da harentzat honelako beka bati bere izena jartzea.

Euskadi Irratiko ARRATSALDEKOA saioan elkarrizketa egin zieten aurreko astelehenean KAMERATOIA '09ko irabazleei. Hemen duzue entzungai:

Aurreko edizioetan bezala, antolatzaileak, epaileak eta ikusleak ahobete hortz utzi zituzten gazteek joan den larunbatean Bermeon egin zen KAMERATOIA ‘09n. Lehiakideek hamar orduko epea zuten (goizeko bederatzietatik arratsaldeko zazpiak arte) gai hori eta ondoko zerrendan agertzen diren ezaugarrietako lau gutxienez hartuta, gehienez hiru minutuko iraupena izan zezakeen bideoa sortzeko.

 

Guztira, 115 gazte bildu ziren KAMERATOIAn parte hartzeko, 20 taldetan banatuta. Taldeak Hego Euskal Herri osotik etorri ziren: 12 Bizkaitik (haietatik 3 Bermeotik), 6 Gipuzkoatik, eta beste bana Araba eta Nafarroatik.

Hamar orduko epea ez da erraza betetzen, eta azkenean, taldeetako bostek ezin izan zuten lana entregatu, denbora falta edota arazo teknikoak tarteko. Hala ere, giroa ezin hobea izan zen egun osoan zehar, eta bereziki gaueko bederatzietatik aurrera Nestor Basterretxea Aretoan egin zen proiekzioan eta osteko sari banaketan.

Epaileek nabarmendu zutenez, lan guzti-guztiek erakutsi zuten maila tekniko eta sortzaile handia, eta esan gabe doa sekulako meritua dutela egindako lan guztiek, lehiaketan sartu ala ez. Dena den, sariak hiru talderi eman behar zitzaizkien, eta hauek izan ziren aukeratutakoak:

 

3. SARIA (900 euro)

“Joselontxo” izeneko lana, Lelokeri Films taldearena. Herriko sasi-Casanovaren gorabejerak kontatzen ditu bideoak, umorezko tonoan.

2. SARIA (1.200 euro)

“Neguko hitzak” izeneko lana, Nafarroa aldetik etorri zen Epalzaren Alargunak taldearena. Guztiz bestelako tonoan, Bermeoko zoro etxetik atera berri den neskato baten gorabeherak ikus daitezke bideoan.

1. SARIA (1.500 euro)

“Nireak dira!”, Blakandeker taldearena. Bermeon arroparekin gertatzen den fenomeno bitxi bat azaltzen du bideoak, oraingoan ere umoreari helduta.

 

Antolakuntzatik, eskerrak eman nahi dizkiegu Bermeora hurbildu ziren talde guztiei, eta zorionak egindako lanagatik zein egun osoan herrian sortu zuten giroagatik. Hurrengoan espero zaituztegu!!!

Goiza aurreikusi bezala joan da: taldeek 9etan hartu dute gaia eta ezaugarrien berri, eta uneotan herrian zehar sakabanatuta daude, grabazio lanetan. Bazkalostean Kultur Etxeab bilduko dira edizio lanei ekiteko, eta 19:00etarako lana amaitu eta entregatuta eduki behar dute. Gero atsedenaldi bat egingo da, eta gaueko bederatzietan lanen proiekzio publikoa egingo da Nestor Basterretxea Aretoan, ondoren sari banaketari ekiteko. Irabazleen lanak ahal bezain pronto jakinaraziko ditugu.

Datorren larunbatean izango da KAMERATOIA, Euskal Herriko Ikus-entzunezko Rallyaren bosgarren edizioa. Lehiaketa Bermeon izango da eta, lehen aldiz sortu zenetik, antolatzaileek —TOPAGUNEAk eta Bermeoko Udalak— erabaki zailak hartu behar izan dituzte parte hartzeari dagokionez, izen-emateak aurreikuspen guztiak gainditu baititu.

Izan ere, 40 taldek adierazi dute KAMERATOIAn parte hartzeko gogoa, baina, arrazoi teknikoak tarteko, parte-hartzaile kopuruak mugatua behar du, eta taldeen erdiak lehiaketatik kanpo geratu behar izan dira. Guztira, 115 gazte bilduko dira Bermeon, eta bertan emango dute eguna, kamera eskutan, hara eta hona.

Geldirik egoteko denborarik ez dago KAMERATOIAN. Erlojuaren kontrako lehiaketa da, eta lehiakideek hamar orduko epea dute gehienez hiru minutuko bideo baten gidoia idatzi, irudiak grabatu eta edizio lanak egiteko. Lana egunean egiten dela ziurtatzeko, egunean bertan jakingo duten gaia eta herriko zenbait ezaugarri sartu beharko dituzte bideoetan. Egunean zehar, edizio gunea Kultur Etxeko Nagusien Egoitzan egongo da, eta zalantzarik gabe, mugimendu handia izango da bertan goizeko 9:00etatik aurrera.

Taldeek 19:00etan entregatu beharko dituzte lanak amaituta, eta jarraian bi orduko atsedenaldia izango dute, tentsioa baretu eta eguneko nekea ahazteko. Lehiaketaren erdigunea Nestor Basterretxea aretora igaroko da orduan. Bertan egingo da egunean sortutako lanen proiekzioa, 21:00etatik aurrera, eta ondoren sari banaketa: ikus-entzunezkoen munduko aditu talde batek osatutako epaimahaiak 1.500, 1.200 eta 900 euroko sariak emango dizkie lanik onenei, kalitate teknikoa, originaltasuna, freskotasuna eta beste zenbait ezaugarri kontuan hartuta.

 

Kameratoia '09n izena emateko epea amaitu egin da. Parte hartzea oso altua izan da aurten, eta beraz aukeraketa egin beharko dugu izena eman duzuen guztion artean. Egon adi, finalera zeintzuk zatozten datozen egunotan erabakiko dugu eta!

Topaguneak eta Bermeoko Udalak Bilbon aurkeztu dute Kameratoiaren 5. edizioa. Lehiaketa abenduaren 12an izango da Bermeon, eta izena emateko epea azaroaren 30era arte dago zabalik. Gogoratu bakarka nahiz taldeka eman daitekeela izena, eta parte hartzeko baldintzak hemen bertan irakur ditzakezuela.

Orain aukera paregabea duzue kameratoilariok zuen artea lagun eta senideei erakusteko. Gaur bertan hasita, ETB3 ko 'Martina' saioa Tabakaleran sortutako lanak emititzen hasiko baita.

Esan bezala, gaur bertan (urtarrilak 19) hasiko dira saioan Kameraotiko bideoak emititzen. Lehenengoa hirugarren saria eskuratu zuen "PD.: Ondo ibili" izenekoa izango da, Puntutaparte taldearena.

Martina astelehenetan emititzen du ETB3k, 21:00etan, eta astean zenbait aldiz errepikatzen dute. ETB3ren webgunean ere eskegi egiten dute saioa, telebista digitala oraindik hartzerik ez duzuenontzat. Emisio orduen berri zehatza izateko, kontsultatu ETB3ren programazio orria.

Euskaltuberekin arazotxoren bat edo beste izaten ari gara, eta, bertako kanala martxan jartzen dugun bitartean, hemen bertan ere ikusi ahal izango dira KAMERATOIA '08ko bideoak, horrterako sortu dugun orrialde berrian. Kontatu, kontatu lagunei! ;)